قصيدة إهداء من مبارك لشعب مصر

شعر حسني مبارك ................ إهداء إلي شعب مصر

يا شعبي حبيبي يا روحي يا بيبي يا حاطك في جيبي يا بن الحلال
يا شعبي يا شاطر يا جابر خواطر يا ساكن مقابر و صابر و عال
يا واكل سمومك يا بايع هدومك يا حامل همومك و شايل جبال
يا شعبي اللي نايم و سارح و هايم و في الفقر عايم و حاله ده حال
احبك محشش مفرفش مطنش و دايخ مدروخ و آخر انسطال
احبك مكبر دماغك مخدر ممشي أمورك كده باتكال
و احب اللي ينصب و احب اللي يكدب و احب اللي ينهب و يسرق تلال
و احب اللي شايف و عارف و خايف و بالع لسانه و كاتم ما قال
و احب اللي قافل عيونه المغفل و احب البهايم و احب البغال
وو احب اللي راضي و احب اللي فاضي و احب اللي عايز يربي العيال
و احب اللي يائس و احب اللي بائس و احب اللي محبط و شايف محال
و احبك تسافر و تبعد تهاجر و تبعت فلوسك دولار أو ريال
و احبك تطبل تهلل تهبل عشان ماطش كوره و فيلم و مقال
و احبك تأيد تعضض تمجد توافق تنافق و تلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك و تفتح جدال
و تبدأ تشاكل و تعمل مشاكل و تنكش مسائل و تسأل سؤال
و عايز تنور و عايز تطور و تعمللي روحك مفرد رجال
ساعتها هجيبك لا يمكن أسيبك و راح تبقي عبره و تصبح مثال
حبهدل جنابك و اذل اللي جابك و حيكون عذابك ده فوق الإحتمال
و امرمط سعادتك و اهزأ سيادتك و اخلي كرامتك في حالة هزال
و تلبس قضية و تصبح رزيه و باقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمال